أقوال

شعر عن الظروف الصعبة والمعافرة

شعر عن الظروف الصعبة والمعافرة

شعر عن الظروف الصعبة

إديني أسبابي اللي انا هعافر عشانها!
خطوِة معافرَة بدون هدف.. خسران تمنها
الوقعة بتخَلَّص رصيدي من الحماس في مكالمة واحدة
والرجل بتدبدب من الإحساس بخنقة مش انتصار
ماقدرش اقول الوقت حان لمحاولة تانية..
وانا وقتي مشغول..
من بداية ما اصحى ولحد اما انام..
بالإنهيار

شعر عن الدنيا القاسية


سيبت الحاجات من بابها لـ اللي أولى بيها
أنا مش هكمل فيها.. علشان ابتديها
جاايز فُرص في إيديا تبقى..
غنيمة في إيدين حد غيري
أو مفيش مجهود يساعها
مش عدل اشوط الكورة وانا واقف تسلل
لما غيري يجيبها جول..
تحسب لُه فوز..

كلام عن الظروف القاسية


أحسن ما تتاخد عليا أوان ضياعها!
بدخل في سباقات الحياة بباقي العزيمة
لو فوزت خير..
أو ابقى شيك وقت الهزيمة
بجري ومفرَّق أملى فـ طرق شتَّى
بجري ولاقيت الحزن جه فوق منِّي شتَّا
بجري برغم ان السَبَق خلصان
وفـ ودني مزيكا انتصار.. ساكتَة!
بجري لإني مع الوقوف.. هخسر كتير
بجري برغم الإنهزام حتى!
أنا من ضحايا التجربة القاسية..
والتجربة الأقسى

إقرأ أيضا:يعود بي الهدوء إلى ذكريات لا تعود

كلام عن المعاناة


وملامحي من يأس الخسارة.. اتحولت بائسة
وسألت نفسي لما فاض الكيل
عدَّى الكتير م الحزن؟.. ولَّا.. مبتداش؟
ولَّا اللي عدَّى كان بداية السيل؟
انا شوفت جثِّة بكرة في الإنعاش
ومجهزِّين له النعش.. حتى ان عاش
وانفض حولُه الناس في وقت الشيل!
هل كان نصيبي أبقى م التايهين؟
هل كان نصيبي اطلع قَلْيل الحيل؟
إديني أسباب تستحق اتعب عشانها
لو في المعافرة مفيش عليا جرام عَتَب
مش بُخل جُهد.. لكني قلقان م النتيجة
انا كل ما اطلع بالسلالم دور جديد
بلقاني واقِف ع العَتَب!
وبلاش تقول حاول وصوتك فيه قلق.. زَيِّي
لو زيي تبقى محتاج حد يديلك سبب!

إقرأ أيضا:كيف أقنع والدي بالزواج ممن أحب
السابق
ابيات شعر عن الحياة معبرة
التالي
كلام عن النصيب في الحب والزواج